港澳清華生 強制要軍訓

【明報專訊】8月係大學迎新期,內地大學普遍設有新生軍訓,不過一般容許獲取錄嘅香港學生自由參與。《北京青年報》報道,清華大學今年強制香港及澳門學生須接受約3星期軍訓,包括野外定向、實彈射擊及防空反恐演練等,2018年約有60名港澳台學生參與。有升學專家話,過往聽聞港生對內地大學軍訓有憂慮,擔心被洗腦。

《北京青年報》報道,清華過往新生軍訓容許港澳台學生自願參與,2018年更改安排,港澳學生須一齊參加軍訓,台灣學生可自行決定。過往學生軍訓內容分軍事技能訓練同軍事理論教學兩部分,前者包括軍體拳、野外定向、實彈射擊、戰傷自救與互救、防火防空反恐演練等;另須上堂及完成報告。

學友社學生輔導中心總幹事吳寶城話,內地嘅大學普遍設有新生軍訓,但大多容許港生自己決定係咪參與。佢話曾有中學生同佢講,擔心兩地文化差異,唔適應軍訓;亦有唔傾向參加軍訓嘅學生話憂慮被洗腦及限制言論自由。

2017年有逾3000名港生升讀內地不同大學,每年有20多名港生入讀清華;被問到軍訓會否令有意升讀內地大學港生卻步,吳寶城就話現階段暫未觀察到好多內地大學強制學生軍訓,而且要視乎課程本身吸引力,認為幾星期嘅軍訓只佔大學生活短時間,影響不大。

 

文章日期:2018年8月21日 (二)