赴台港生畢業後可留1年

赴台港生畢業後可留1年

【明報專訊】呢幾年多咗學生選擇去台灣讀書,原本港澳畢業生只可以留半年,若搵唔到嘢做就要返港;台北經濟文化辦事處2018年12月18日就公布,台灣內政部同移民署近排修訂條例,由12月5號起,去台灣讀書嘅港澳生,延期居留由以前6個月,可再申請延長1次,即最多可以居留1年。

台北經濟文化辦事處話赴台升學嘅港澳生畢業後,要用書面方式,解釋清楚點解要喺台灣延期居留,辦事處講到明話總延長居留時間最長可達1年,方便畢業生搵工。

辦事處話現時台灣有超過8000個香港學生,畢業生其中可以循「畢業僑外生工作評點配額制」申請喺台灣做嘢,只要喺學歷同工作經驗等8項評點指標點數滿70點,喺台灣做嘢兼住滿5年,就可申請定居台灣。按台灣勞動部勞動力發展署統計,2017年有3300人次獲准留台工作;其中有270人次港生申請,當中超過九成就係用評點配額制。

 

日期:2018年12月19日 (三)